Вториот изборен круг ќе даде одговор дали Ахмети со победа во Кичево и, евентуално, во Тетово ќе успее ДУИ да ја извлече од амбисот, зашто владејачката Вреди го потврди легитимитетот за кој постојано беше напаѓана. Останува дилемата како ВМРО-ДПМНЕ и Вреди ќе владеат во Собранието без Бадентерово мнозинство
Првиот круг на Локалните избори во албанскиот политички блок покажаа сериозно нишање на авторитетот на до неодамна неприкосновениот лидер на ДУИ Али Ахмети, или, како што веќе побараа опонентите од Вреди и од ВМРО-ДПМНЕ, негова политичка пензија. Вреди, пак, и покрај предизборниот удар што им го нанесе Арбен Таравари и неговата Алијанса за Албанците, се консолидира и на бранот е на изборна победа, барем според тежината на освоените општини, особено по победата над Бујар Османи во Чаир. Вториот изборен круг ќе даде одговор дали Ахмети со победа во Кичево и, евентуално, во Тетово ќе успее ДУИ да ја извлече од амбисот, иако според бројот на советници и освоени гласови нивната коалиција Националната алијанса за интеграција (НАИ) води пред Вреди. Владејачката Вреди го потврди и легитимитетот на кој по ланските парламентарни избори постојано атакуваше ДУИ. Останува дилемата како владејачките ВМРО-ДПМНЕ и Вреди ќе менаџираат во Собранието без Бадентерово мнозинство.
